Act 16 | TVK | STEP | Di, Pol nggur sal ni be Derbi e Listra. E rute ak, horam maxoe tei xa di mineket e Iesu da en, hisen Timoti. Ninen be Siu tei xa xi mun mineket, e tamen be ngan Kris.

Acts 16

Timoti Mei Mos e Polien na Pol xal Saelas

1 Di, Pol nggur sal ni be Derbi e Listra. E rute ak, horam maxoe tei xa di mineket e Iesu da en, hisen Timoti. Ninen be Siu tei xa xi mun mineket, e tamen be ngan Kris. 2 Kristin sav xil tahal Listra e Aekoniam lanemi labit Timoti be moletin hos tei. 3 Pol ien bei vahur Timoti vahe xalu, ma pol ni be vexaho. Xi pol ni mak vengan xa Siu xil vus xa ladi rute xil ak lakila xa Timoti tave vexaho ti mun vengan xa tamen tave Siu ti. 4 Melele xa di latkakao e taon xil, xatel di latbit kil rae xil xa eloheoh xil del elda xil tahal Serusalem latepol ni mi ngan xil xa latave Siu ti. E di latsel xat xil tengan lilong xat rae xil ak. 5 Misak ni ngan xil te sias xil vus, neketen nae mei nggeih mu. E melengien xil ngasen, moletin sav xil mun lamei lamos del xil.

Pol Metuve e Pus Ngan Masedonia Tei

6 E kakaoen na Pol xatel Saelas e Timoti, Ninin Eo tamaen xatel ti tengan latsetu ni sepinien na Hi e provins tahal Esia. Misak ni latnggo sutang e rute xil tahal Frikea e provins tahal Kalesia. 7 E melele xa latduxoh haxot te provins tahal Misia e provins tahal Bitinia, Ninin Eo na Iesu tamaen xatel ti tengan latohe Bitinia. 8 Ma xatel latkakao latoba latnggo provins tahal Misia e ba latbe Troas. 9 E vongien nen, Pol metuve e pus moletin tei tahal Masedonia. Xi misoh e di mikesi bit, “!Amei li e Masedonia e mei ututou ni xamem!” 10 Melele xa Pol pus metuveen ak, minem kila xa Hi ien bei xa ha latsetu ni longeongen hos nan mi ngan Masedonia xil. Misak ni latbue xat xatel e inou mun, Luk, namos e xatel ^{▼▼16:10 Luk xa tetis uvei ak temos e xatel e hal Troas.} matobe.

E Taon tahal Pilipae, Lidia Mei Mineket

11 Xametel matnggo tuturil tei e Troas e matnggur xoteh tas matbe Samotres. Di, e makoe nen, tuturil ak be ut e taon tahal Neapolis. 12 Di, matkakao matnggo rute ak ba mattestal e taon tahal Pilipae xa be taon tei xa eilep e provins tahal Masedonia. Kavmen tahal Rom tehur taon ak mei tehe taon tei mun nan. ^{▼▼16:12 Rae xil te taon ak momal ni ngan xil tahal Rom tang. E moletin xil holu xa ladi en labe hortan xil tahal Rom.} Xametel matdi melengien vahis mun en.

13 E Sabat, xametel matbe reling taon e matbe rute tei sangas ni oeisal. Matenemi matobit rute ak iaxa be von sisen na Siu xil. Ma matdotan e di matsepin del atou votei xil xa mei ladi vituei ngamu. 14 Tei e xil xa di miteong ni xametel, hisen Lidia. Xi tahal Taeatira e xi iaxa di pos ni kaliko xil xa bihili e bos pupu. Xi be atou tei xa tave Siu ti e vehakut di mot mi Hi. E Hi misah puiteh e meulien nan tengan vakil kuh naha xa Pol di misepin ni. 15 E melengien nen tak, xi del ngan xil vus xa ladi tim san lamae ni Pol derir ni xil e oei. Di, misis xametel bit, “Xosxa mutbit nabe moletin na Hi reitin, mei ha mutti nim mavan.” Ma matmae ni be xametel matodi.

Moletin Xil tahal Pilipae Laso Pol Xal Saelas Lube Nim te Xeih

16 Vatei, matoba tengan mathe von sisen e matbisu mi atuli tei xa be slev. Atuli ak, ninin tesa tei da en xa misak ni mikila vake mese ni naha xa istal e melengien xil xa ti imei. Atuli ak, moletin xil holu lamei tengan xi ti vahit kil holesok xil xa istal e meulien nae. Misak ni moletin xatel xa atuli ak de pe heatel, di latlihi vatu xil xa holu nggo en. 17 Xi di nggusil Pol e xametel e di mikei nggeih bitene, “!Moletin xil ak labe slev xil na Hi xa mili hi sav xil! !Xil di lasep kil suse xa Hi iteh meulien e xamim ixo en!” 18 Melengien holu xi di pol ni mak, misak ni Pol ien mikat ma biles biteni mi ninin tesa ak bitene, “!E his Iesu Kristo, nasemae ni xa uhe reling atuli xai!” Ma vatakes, ninin ak be relingi.

19 Melele xa moletin xatel xa di pol mi xatel latpus kila xa atuli ak misakras valihi ti mun vatu vahe natel, latdal xat Pol xal Saelas e latdel xalu lube von koten xa de hilaep te taon. 20 Latdel xalu luba lusoh e pe met moletin xil te lepisien e von vitueien e latbiteni mi xil latbit, “Moletin xalu ak di lupol ni holesok xil xa misa e taon nar. Lube Siu 21 e di lupispisi xa xir, mol-Rom xil, rihusil sexien nae xil, e rae nar xil latamae ni ti tengan ravuri e ravousili.” 22 Moletin xil vus di lasuv xat xatel e di lasepin nggeih ba xat Pol xal Saelas e di lasak tengan lati xalu.

Di, moletin te lepisien xil ladal papas eising na Pol xal Saelas be reling xalu e lasemae ni moletin te vaeen xil tengan va lavas pangas xalu ni liei. 23 Labas purun xalu bus, laleh xalu ba, laso xalu lube nim te xeih e labiteni mi moletin xa di miketeh xol nim ak tengan ivar xat kuh xalu. 24 Melele xa moletin ak milong sepinien nae, xi miso xalu lube namba sikis e bar xat le xalu del xat liei tei xa meas. Ludit mak tang.

25 E hilaep te vongien, Pol xal Saelas di lusis e di lukikei ni sisien xil ba ni Hi, e ngan tesav xil xa ladi sangas ni xalu di lateong ni xalu. 26 E melele xa di tamu lupol ni mak, latemanin e lul tei xa nggeih milil, e misak ni nim te xeih ak mulul pupu. Puiteh xil vus lasaha e sen xil vus xa tevar xat xil lameluv reling moletin xil xa lateti e nim te xeih. 27 Lul ak misak ni moletin xa di milaxat nim te xeih mitemanin. E melele xa mitamea, pusi xa puiteh xil vus milel. Xi minemi bit moletin xil vus xa lateti e nim te xeih latlesae ngamu, ma milihi rat tiei te vaeen nan e bit vatil vin xi mun tang ni. ^{▼▼16:27 Sexien na mol-Rom xil biteni bit xosxa moletin te vaeen tei mae ni moletin tei xa di laketeh xole ba ven mase, xi sung ihur longpangasien na moletin ak.} 28 E Pol mikei nggeih ba ni bitene, “!Onahasuk ti! Xamem vus madi tak.”

29 Ma moletin ak mikei tengan lapo laet tova vamei. Di, miloh ba, mitingeiril pe met Pol xal Saelas, e len mulul pupu. 30 Melele xa miling kuh moletin sav xil e nim te xeih ak, midel Pol xalu lustal e misis xalu bitene, “?Suv xalu, nipol ni itep tengan Hi iteh meulien e nou?”

31 Xalu lubit rilomun ni mini lubit, “Uneket e Suv Iesu ma xi iteh meulien e xouk, xouk itel ngan xil vus xa ladi tim sam.” 32 Di, xalu lusetu ni sepinien usil Suv Iesu mini e mi mosav xil mun xa ladi tim san. 33 E melele nen tak, e vongien, moletin xa di milaxat nim te xeih ak mileh xalu ba mikas moten von liei xa latehas xalu ni. Di, xi del nan xil vus mei laneket e Iesu, ma Pol derir ni xil e oei. 34 Di, mileh Pol xal Saelas latbe nesao e nim man, ba misa anien mi xalu. Xi del nan xil vus lamaal pupu vengan xa xil mei laneket e Hi.

35 Melele xa ut milan, moletin xil te lepisien lasil polis nae xil del sepinien ak, “Ha mumae ni moletin xalu xai ha vexalu imase.”

36 Ma moletin xa di milaxat nim te xeih biteni mi Pol bit, “Moletin xil te lepisien lamae ni xamil muliha ha vemil imase. Ma mulkila mulistal. Muliha itel xat tomat na Hi.”

37 E Pol biteni mi polis xatel ak bitene, “Neta sav xa lattakamet ti naha xa xamel mapol ni misa, latmae ni xamel ba labas purun xamel pe met moletin xil. Di, laso xamel mabe nim te xeih. E xamel mabe hortan te kantri tahal Rom. ^{▼▼16:37 E melele nen ak, rae na mol-Rom xil biteni bit neta sav xosxa eilep xil labas purun movotei xil, e mi hortan xil te kantri tahal Rom xil, lasakras. Hortan xil ak lihe pe met moletin te lepisien itiamu, ti, xi mikila isa pangasien teni mi xil.} ?E taxeak labit lasil xuxus ni xamel maloha? !E-e, namak ti! Xil tang limei litel xamel e liling kuh xamel sung.”

38 Ma polis xatel latdilomun be latobit sepinien xil ak mi moletin te lepisien xatel, e melele xa latlonge xa Pol xal Saelas lube hortan te kantri tahal Rom, uliatel mikan. 39 Ma xatel ba latobit esaeen natel mi Pol xal Saelas. Di, latdel xalu lustal e nim te xeih e latsis xalu tengan lalhe reling taon nae. 40 Melele xa Pol xal Saelas lumea reling nim te xeih, luba lube nim ma Lidia. E rute ak, xalu lubitue del Kristin sav xil e lusel xat xil vatei mun. Di, lumea lube reling taon ak. ^{▼▼16:40 Rakila xa Pol miling Luk dat e rute ak vengan e sepinien xil xa itutou, Luk tamos ti mun e xil. Melele xa Pol isao rilomun ni Kristin xil e hal Pilipae e 20:5, Luk ihusili rilomun.}